Ceyhun Hacıbəyli küçəsi 100, AZ1007

Vəkillər Kollegiyası vəkilliyə qəbulda müxalif görüşlü hüquqşünasların qəsdən kəsilməsi iddiasına münasibət bildirib

07 iyun 2018    1241

Vəkillər Kollegiyası Rəyasət Heyətinin sədri Anar Bağırov vəkilliyə qəbulla bağlı müsabiqədə, xüsusən müsahibə mərhələsində müxalif görüşlü hüquqşünasların qəsdən kəsilməsi, onlara məqsədyönlü maneələr yaradılması barədə iddialara münasibət bildirib.

APA-nın məlumatına görə, A. Bağırov deyib ki, Vəkillər Kollegiyası hər zaman bu yöndə hər hansı iddiaya münasibətini bildirir.

Vəkillər Kollegiyası Rəyasət Heyətinin sədri tam məsuliyyətlə vəkilliyə qəbul zamanı heç bir ayrı-seçkiliyə yol verilmədiyini vurğulayıb: "İmtahanlarda kəsilənlər sırasında dövlət qulluğunda olanlar da, hakim Yeni Azərbaycan Partiyasının üzvləri də var. Belə olan halda bunu necə izah edirlər? Biz vəkilliyə qəbulla bağlı müsabiqə zamanı kiminsə partiya mənsubiyyətini, yaxud dini mənsubiyyətini yoxlamırıq. Tələblər qanunla müəyyən olunub və biz o tələblərə uyğun sənədləri qəbul edirik. İnsanların hər hansı partiya, dini mənsubiyyəti və digər amillər bizim üçün hər hansı əhəmiyyət kəsb etmir. Tam məsuliyyətlə bildirirəm ki, kəsilənlər sırasında Yeni Azərbaycan Partiyasına mənsub insanlar azlıq təşkil etmir. Bunların sırasında başqa partiyaların da üzvləri ola bilər, var da. Yeri gələndə, Yeni Azərbaycan Partiyasının üzvləri də kəsilməklə bağlı şikayətlər edirlər. Vəkilliyə qəbulla bağlı müsabiqədə hər hansı ayrı-seçkilik ola bilməz. Bu iddialar uydurma, böhtandır. Təbii ki, imtahanda kəsilən adam zəif cavab verdiyini söyləməyəcək, min bir səbəb gətirəcək. Təəssüf ki, insanlarda bu problem var, biz bunu görürük və lazımi reaksiya göstəririk".