Azərbaycanda səfərdə olan Amerika Hüquq Məktəbinin (SAL proqramı) təsisçiləri Ketevan Jeladze və Maia Meskhi martın 30-da Vəkillər Kollegiyasında olublar.

Qonaqları salamlayan Kollegiyanın sədri Anar Bağırov rəhbərlik etdiyi qurumun fəaliyyəti, görülən işlər barədə ətraflı məlumat verib, son illərdə çoxsaylı təhsil müəssisələri və beynəlxalq təşkilatlarla memorandumlar imzalanaraq xeyli faydalı əməkdaşlıqların əldə olunduğunu bildirib və vəkillərin peşə hazırlığının artırılmasının Kollegiya üçün vacib elementlərdən biri olduğunu vurğulayıb.

Səmimi görüşə görə təşəkkürlərini bildirən qonaqlar ölkəmizə səfər etməkdən məmnun olduqlarını bildirib və Vəkillər Kollegiyası ilə əməkdaşlığın üstünlüklərindən danışıblar.

Bildirilib ki, SAL proqramı ilk il üzrə Gürcüstanda iki semestr davam edir. İki semestrlik proqramı bitirdikdən sonra, məzunlar Çikaqo-Kentdə hüquq üzrə magistr (LLM) təhsillərini davam etdirə bilərlər. Qeyd olunub ki, Çikaqo-Kent Hüquq Kolleci ABŞ üzrə məhkəmədə vəkillik sahəsində 7-ci, əqli mülkiyyət hüququ sahəsində 12-ci, hüquqi yazı sahəsində isə 39-cu yerdədir.

Sonra Amerika Hüquq Məktəbi ilə Vəkillər Kollegiyası arasında anlaşma memorandumu imzalanıb.

Əldə olunmuş razılığa əsasən, Kollegiyanın üzvləri müstəsna olaraq aşağıdakı güzəştləri əldə edirlər:

1. Qəbul zamanı Vəkillər Kollegiyası üzvlərinə üstünlük;
2. Vəkillər Kollegiyasının üzvləri SAL proqramı təhsili üçün əlavə 10% endirim (SAL üçün sabit təhsil haqqı 6 950 ABŞ dolları əvəzinə, 6 255 ABŞ dolları);
3. Amerikalı müəllim tərəfindən pulsuz onlayn hüquqi ingilis dili kursu;
4. Amerikalı professorlar tərəfindən Vəkillər Kollegiyasının üzvləri üçün xüsusi təlimlər və master-klaslar.

Daha sonra Çikaqo-Kent Hüquq Kollecində isə təqdim olunan güzəştlər:

1. SAL məzunları magistratura təhsilini başa vurub LLM diplomunu bir tədris ili əvəzinə bir semestrdə qazana və 43 800 ABŞ dolları əvəzinə, sabit 10 000 ABŞ dolları ödəyə bilər;
2. GPA 3.8-dən yuxarı olan SAL məzunlarına tam 100% təhsil təqaüdü verilir;
3. SAL məzunları IELTS/TOEFL imtahanlarından azad edilir;
4. LL.M semestri SAL-dan dərhal sonra və ya SAL-ı bitirdikdən sonra üç tədris ili ərzində istənilən semestrdə davam etdirilə bilər;
5. Çikaqo-Kentin daxili innovativ hüquq klinikaları vasitəsilə praktiki təcrübə;
6. Çikaqo hüquq icması, ən yaxşı özəl hüquq firmaları, korporasiyalar və müxtəlif vəkil qurumları ilə birbaşa əlaqələr və təcrübə fürsətləri;
7. Çikaqo-Kentdə iki semestr keçirən tələbələr ABŞ-da “OPT”-yə daxil ola bilərlər (12 aylıq təhsildən sonrakı iş icazəsi);
8. Çikaqo-Kentdə iki semestrdən sonra məzunlar ABŞ-da vəkillik imtahanı verə bilərlər.

Əlavə məlumat:

1. SAL proqramı 2 semestr üçün nəzərdə tutulmuşdur və Çikaqo-Kent Hüquq Kollecində magistr dərəcəsi üçün 10 kredit verir;
2. 2 semestrlik proqramı bitirdikdən sonra məzunlar 3 il ərzində Çikaqo-Kent Hüquq Kollecinə müraciət edərək hüquq üzrə magistr (LLM) təhsillərini orada davam etdirə bilərlər;
3. SAL proqramının dərsləri onlayn qaydada və ya Bakı / Tbilisi ərazilərində mövcud auditoriyalarda tədris oluna bilər; ayda bir dəfə isə həftə sonlarında keçirilməsi planlaşdırılır;
4. TOEFL / IELTS tələb olunmur;
5. SAL proqramı üzrə AR Vəkillər Kollegiyasının üzvləri üçün təhsil haqqı 6 255 ABŞ dolları təşkil edir (hissə-hissə ödəmə imkanı ilə).

Müraciət edənlərin seçim meyarları:

1. Hüquq üzrə bakalavr dərəcəsi;
2. İngilis dilində yaxşı səviyyədə yazılı və şifahi ünsiyyət qurma bacarığı (TOEFL / IELTS tələb olunmur);
3. Müsahibədə uğurlu iştirak.

Tələb olunan sənədlər:

1. İngilis dilində tərtib olunmuş tərcümeyi hal - CV (tövsiyə edən şəxsin adı və əlaqə məlumatları qeyd olunmaqla);
2. İngilis dilinə tərcümə edilmiş və notarial qaydada təsdiq olunmuş diplomun və diploma əlavənin surətləri;
3. Xarici pasportun və ya şəxsiyyət vəsiqəsinin surəti;
4. Vəkil vəsiqəsinin surəti.

Qeyd edək ki, fevral 2024 - dekabr 2024 semestri üzrə SAL proqramına müraciət üçün son tarix 2023-cü il dekabr ayının 23-ü olaraq müəyyənləşdirilmişdir.

Müraciət etmək istəyənlər tələb olunan sənədləri elektron (skan edilmiş) formatda saladmissions@kentlaw.iit.edu və admission@chicagokentlaw.ge elektron poçt ünvanlarına yönləndirilməli və ya onlayn qayda müraciət linki vasitəsilə qeydiyyatdan keçməlidir.

Əlavə olaraq, AR Vəkillər Kollegiyasının elektron poçt ünvanına (office@barassociation.az) məktub ünvanlayaraq müraciət barədə məlumat verməyiniz xahiş olunur. AR Vəkillər Kollegiyası müraciət edənlər tərəfindən məktubu aldıqdan sonra rəsmi qaydada SAL proqramının təsisçilərinə müvafiq məlumatı yönləndirəcək və müraciət edən vəkillər üçün təhsil haqqına güzəştlər tətbiq olunacaq.

Namizədlər üçün keçiriləcək hüquqi ingilis dili kurslar, xüsusi təlimlər və master-klaslar barədə əlavə məlumat veriləcəkdir.