Ceyhun Hacıbəyli küçəsi 100, AZ1007

VƏKİLLİYƏ QƏBUL

NAMİZƏDLƏR ÜÇÜN TƏLƏBLƏR

Vəkil olmaq üçün namizədlər:
- ali hüquq təhsilli olmalı;
- hüquqşünas ixtisası üzrə bir ildən az olmayaraq iş stajına malik olmalı və ya elmi və pedaqoji təhsil müəssisələrində hüquq sahəsində üç ildən az olmayan müddətdə fəaliyyət göstərmiş olmalı;
- İxtisas Komissiyası tərəfindən peşə yararlılığının müəyyən edilməsi məqsədi ilə keçirilən yazılı testdən və şifahi müsahibədən ibarət olan ixtisas imtahanını müvəffəqiyyətlə verməli;
- müvafiq icra hakimiyyəti orqanının tədris-elm müəssisəsində icbari təlimi müvəffəqiyyətlə bitirməlidir.

Aşağıdakı şəxslər vəkil ola bilməzlər:
- ikili vətəndaşlığı, digər dövlətlər qarşısında öhdəlikləri olan şəxslər;
- qanunla müəyyən edilmiş qaydada fəaliyyət qabiliyyəti olmayan və ya məhdud fəaliyyət qabiliyyətli hesab olunmuş şəxslər;
- qanunvericiliklə müəyyən edilmiş qaydada alınan tibbi rəyə əsasən əqli qüsurlarına görə vəkillik fəaliyyətini həyata keçirməyə qadir olmayan şəxslər;
- qəsdən az ağır, ağır və ya xüsusilə ağır cinayət törətməyə görə məhkumluğu ödənilməmiş və ya götürülməmiş şəxslər;
- barəsində tibbi xarakterli məcburi tədbirlərin tətbiq edilməsi haqqında qanuni qüvvəyə minmiş məhkəmə qərarı olan şəxslər.

• Əvvəllər vəkil (intizam qaydasında vəkillik fəaliyyətinə xitam verilmiş şəxslər istisna olmaqla) və ya hakim olmuş şəxslər yazılı testi vermədən müsahibədən keçərək icbari təlimə cəlb olunmaqla həmin təlimi müvəffəqiyyətlə keçdikdən sonra vəkilliyə qəbul olunurlar
• Hüquq elmləri doktoru elmi dərəcəsi olan şəxslər, habelə əvvəllər Azərbaycan Respublikası Konstitusiya Məhkəməsinin hakimi, apellyasiya və kassasiya instansiyası məhkəmələrinin sədri vəzifəsində işləmiş şəxslər yazılı testi vermədən, şifahi müsahibədən keçmədən və icbari təlimə cəlb olunmadan vəkil ola bilərlər.

TƏLƏB OLUNAN SƏNƏDLƏR


İXTİSAS İMTAHANININ YAZILI TEST MƏRHƏLƏSİNDƏ İŞTİRAK ÜÇÜN MÜRACİƏT QAYDASI

Azərbaycan Respublikası Vəkillər Kollegiyası Rəyasət Heyətinin 10 iyul 2024-cü il tarixli qərarı ilə namizədlərin sənəd qəbulu elektron qaydada həyata keçirilir.

Qeyd: Həmçinin Azərbaycan Respublikası Vəkillər Kollegiyası Rəyasət Heyətinin 25 sentyabr 2024-cü il tarixli qərarı ilə Kollegiya üzvlüyünə qəbulla bağlı imtahan xərclərinə sərf edilməsi üçün nəzərdə tutulmuş məbləğə dəyişiklik edilərək 300 manat müəyyən edilmişdir. Şəhid ailələri, müharibə veteranları, habelə Çernobıl AES-də qəza nəticəsində şüa xəstəliyinə və şüa yükü ilə əlaqədar xəstəliyə tutulmuş, habelə bu xəstəlikləri keçirmiş şəxslərə güzəşt tətbiq edilərək 150 manat müəyyən olunmuşdur.

Eyni zamanda, Vəkillər Kollegiyası üzvlüyünə qəbulla bağlı ixtisas imtahanının şifahi müsahibə mərhələsində iştirak etmək istəyən sabiq vəkil və hakimlərə imtahan üçün ödəniş 150 manat müəyyən edilmişdir.
 

İXTİSAS İMTAHANININ ŞİFAHİ MÜSAHİBƏ MƏRHƏLƏSİNDƏ İŞTİRAKI ÜÇÜN TƏLƏB OLUNAN SƏNƏDLƏR
 
İxtisas imtahanlarının yazılı test mərhələsindən müvəffəqiyyətlə keçmiş namizədlər aşağıda qeyd edilən sənədləri Sənəd Qəbulu Komissiyasına təqdim etməlidirlər:
 
- Vəkillər Kollegiyasının Rəyasət Heyəti tərəfindən müəyyən edilmiş formada ərizə (forma);
- Yazılı test mərhələsinin yekun nəticəsinə dair məlumat vərəqəsi; (link)
- Şəxsiyyət vəsiqəsinin notarial qaydada təsdiq edilmiş surəti;
- Ali hüquq təhsili barədə diplomun notariat qaydada təsdiq edilmiş surəti;
- Əmək kitabçasının notarial qaydada və ya iş yerində təsdiq edilmiş surəti;
- Əqli cəhətdən sağlamlıq barədə tibbi arayış (nümunə);
- Əqli cəhətdən sağlamlıq barədə tibbi rəy;
- 3x4 sm və 4x6 sm ölçüdə, ağ fonda çəkilmiş 4 ədəd rəngli fotoşəkil;
- Kadrların şəxsi məlumat vərəqəsi (A3 formatda) (forma); 
- Tərcümeyi hal (A3 formatda) (forma).

 

HAZIRLIQ PROQRAMI

Vəkilliyə namizədlərin test imtahanına hazırlaşmalarına köməklik etmək məqsədilə Vəkillərin İxtisas Komissiyası vəkilliyə qəbula dair aşağıdakı imtahan proqramını namizədlərin diqqətinə təqdim edir:
 
1. Xüsusilə diqqət yetirilməli olan qanunvericilik aktları: Azərbaycan Respublikasının Konstitusiyası, Mülki, Mülki Prosessual, Cinayət, Cinayət Prosessual, İnzibati Prosessual, İnzibati Xətalar, Ailə, Əmək və Cəzaların İcrası məcəllələri, həmçinin “Vəkillər və vəkillik fəaliyyəti haqqında”, “Konstitusiya Məhkəməsi haqqında” və “Məhkəmələr və hakimlər haqqında” qanunlar.
2. Diqqət yetirilməli olan digər qanunvericilik aktları: Mənzil, Şəhərsalma və Tikinti, Vergi, Torpaq və Seçki məcəllələri, “Azərbaycan Respublikasının insan hüquqları üzrə müvəkkili (ombudsman) haqqında” Konstitusiya Qanunu, Naxçıvan Muxtar Respublikasının Konstitusiyası, “Mediasiya haqqında”, “İnsan hüquqlarının və əsas azadlıqların müdafiəsi haqqında” Avropa Konvensiyası, “İcra haqqında” Qanun, “Notariat haqqında” Qanun, “Məhkəmə ekspertizası fəaliyyəti haqqında” Qanun, “Korrupsiyaya qarşı mübarizə haqqında” Qanun, “Torpaqların dövlət ehtiyacları üçün alınması haqqında” Qanun, “Məhkəmə-Hüquq Şurası haqqında” Qanun, “Prokurorluq haqqında” Qanun, “Polis haqqında” Qanun, “Əməliyyat-axtarış fəaliyyəti haqqında” Qanun, “Təhqiqat, ibtidai istintaq, prokurorluq və məhkəmə orqanlarının qanunsuz hərəkətləri nəticəsində fiziki şəxslərə vurulmuş ziyanın ödənilməsi haqqında” Qanun və “İnzibati icraat haqqında” Qanun.
Test nümunələri
 
1. Cinayət Məcəlləsinin 143-cü ("təhlükədə qoyma") maddəsinə əsasən, həyat və sağlamlığı üçün təhlükəli vəziyyətdə olan və özünü qorumaq üçün tədbir görmək imkanından məhrum olan şəxsi bilə-bilə köməksiz qoyma müəyyən şərtlər daxilində cinayət məsuliyyətinə səbəb olur. Aşağıdakılardan hansı həmin şərtlərə aid deyildir?
A) Köməksiz qoyanın tibb işçisi olması
B) Köməksiz qoyanın zərərçəkmiş şəxsə kömək göstərmək imkanının olmaması
C) Köməksiz qoyanın özünün zərərçəkmiş şəxsi onun həyat və sağlamlığı üçün təhlükəli vəziyyətə salması
D) Həmin şəxsi köməksi qoyanın onun qayğısına qalmalı olması

2. Hüquqi şəxsin hüquq qabiliyyəti nə vaxtdan yaranır?
A) Dövlət qeydiyyatına alındığı vaxtdan
B) Bankda hesablaşma hesabının açıldığı vaxtdan
C) Onun yaradılması barədə təsis sənədlərinin imzalandığı vaxtdan
D) Nizamnaməsinin qəbul edildiyi vaxtdan

3. Aşağıdakılardan kimlərə heç bir halda ictimai işlər növündə inzibati tənbeh tətbiq edilə bilməz?
A) Hərbi qulluqçulara
B) Müddətli həqiqi hərbi xidmət hərbi qulluqçularına
C) 18 yaşına çatmayan şəxslərə
D) Əcnəbilərə və vətəndaşlığı olmayan şəxslərə

4. Azərbaycan Respublikasının Konstitusiyasına əsasən, təcili elan olunan qanun layihəsi qəbul edildikdən sonra hansı müddətdə imzalanmaq üçün Azərbaycan Respublikası Prezidentinə təqdim edilir?
A) 24 saat ərzində
B) 6 saat müddətində
C) 48 saat ərzində 
D) 3 gün müddətində
 

Funksional səriştələrin qiymətləndirilməsi üçün ssenari əsaslı tapşırıqların nümunəsi:

Ssenari:

Ümumi təsvir

Ananın mövqeyi

Atanın mövqeyi

Təqdim edilən sübutlar:

Tərəflər 12 il nikahda olmuşdur.

11 yaşında bir qız övladları var.

 

Uşaq atası ilə görüşmək istədiyini bildirir, lakin “ata ilə danışanda bəzən qorxduğunu” deyir.

Ana məhkəməyə müraciət edərək:
 – nikahın pozulmasını,
 – uşağın yaşayış yerinin onunla müəyyən edilməsini,
 – aliment tutulmasını,
 – atanın uşaqla ünsiyyətinin məhdudlaşdırılmasını tələb edir.

Ana iddia edir ki:
 – ata görüşlər zamanı uşağa qarşı manipulyativ davranır,
 – “səni məndən ayıracaqlar”, “məhkəmə səni məndən alacaq” kimi ifadələr işlədir,
 – bu səbəbdən uşaqda narahatlıq, yuxu pozuntusu və qorxu müşahidə olunub.

Ana hesab edir ki, bu hallar uşağın psixoloji rifahına təhlükə yaradır. Fiziki zorakılıq və ya tibbi diaqnoz yoxdur.

Ata nikahın pozulmasına və alimentə razıdır, uşağın ana ilə yaşamasına etiraz etmir, lakin müntəzəm və geniş ünsiyyət hüququnun təmin edilməsini tələb edir.

Ata bildirir ki:
 – uşaqla emosional bağlılığı güclüdür,
 – ananın iddiaları subyektivdir və sübuta yetirilməyib,
 – uşağın onunla görüşmək istədiyini bildirir.

Ata psixoloji ekspertiza, uşağın fikrinin öyrənilməsi və qəyyumluq və himayəçilik orqanının rəyinin alınmasını xahiş edir.

Ana tərəfindən:
 – yazışmalar (emosional mətnlər)
 – uşağın gecə qorxuları ilə bağlı valideyn gündəliyi
 – uşağın çəkdiyi rəsmlər

Ata tərəfindən:
 – məktəbdən arayış (emosional vəziyyət normaldır)
 – məktəb psixoloqunun qısa rəyi
 – öz iş yerindən müsbət xarakteristika

 



























Tapşırıqlar:

Sual 1:

Ananı təmsil edən vəkil tərəfindən ən düzgün ilkin hüquqi addım hansıdır?

A. Atanın uşaqla ünsiyyətinin tam qadağan edilməsini tələb etmək
B. Psixoloji ekspertiza vasitəsilə uşağın mənafelərinin qiymətləndirilməsini istəmək
C. Yazışmaları əsas sübut kimi təqdim edərək qərar tələb etmək
D. Qəyyumluq orqanının rəyini nəzərə almamağı xahiş etmək

Düzgün cavab: B

 

Sual 2:

Vəkil uşağın fikrini prosesdə necə təqdim etməlidir?

A. Uşağın dediklərini iddia kimi təqdim edilməsini təmin etməlidir

B. Valideynin mövqeyinə üstünlük verilməsini əsas götürməlidir

C. Uşağın fikrinin uyğun şəraitdə dindirilib mütəxəssis rəyi ilə təmin etməlidir

D. Uşağın emosional reaksiyalarının ayrıca sübut kimi qəbul edilməsinə istinad etməlidir

Düzgün cavab: C

 

Sual 3:

Təsvir olunmuş işdə hakimin valideynlik hüquqlarının məhdudlaşdırılmasının xeyrinə qərar verməsi üçün əsas rol oynaya biləcək sübutu seçin:

A. Uşağın çəkdiyi rəsmlər
B. Valideyn gündəliyi
C. Qəyyumluq və himayəçilik orqanının rəyi
D. Yazışmalar

Düzgün cavab: C

 

Sual 4:

Aşağıdakı prosesual addımları düzgün ardıcıllıqla düzün:

(1) Sübutların qəbuledilmə qabiliyyətinin qiymətləndirilməsi
(2) Qəyyumluq və himayəçilik orqanının cəlb edilməsi
(3) Psixoloji ekspertiza təyin edilməsi
(4) Uşağın fikrinin öyrənilməsi

Düzgün ardıcıllıq:
 2 → 3 → 4 → 1

 

Sual 5:

Yaranmış situasiyada ailənin emosional yüklü olduğu nəzərə alaraq vəkil hansı davranışı seçməlidir?

A. Qarşı tərəfi psixoloji baxımdan zəif göstərməyə çalışaraq, onun davranışlarını qeyri-adekvat formada təqdim etmək.
B. Prosesdə üstünlük əldə etmək üçün uşağın emosiyalarını əsas müdafiə vasitəsi kimi istifadə etmək.
C. Tərəflər arasında gərginliyi artıran ifadələrdən uzaq duraraq, arqumentasiyanı prosessual əsaslara söykəndirmək.
D. Məhkəmə qarşısında mövqeni daha təsirli çatdırmaq üçün təqdimatı ictimai rəğbət və anlayış yaradacaq şəkildə qurmaq.

Düzgün cavab: C

ONLAYN-MƏSLƏHƏT

Sualınız var? Onları biz cavablandırarıq!

KEÇ