Aprel ayının 2-də “Ritz-Carlton” otelində Azərbaycan Respublikasının Baş  Prokurorluğunun təşkilatçılığı ilə “Rəqəmsal cinayət prosesi: müasir çağırışlar və hədəflər” mövzusunda geniş konfrans keçirilib.

Ümumilikdə 20-dək müxtəlif dövlət qurumu və hüquq-mühafizə orqanlarının rəhbər vəzifəli şəxsləri, Baş prokuror yanında Elmi-Məsləhət Şurasının üzvləri, ali təhsil ocaqlarının nümayəndələri və vətəndaş cəmiyyəti üzvlərinin iştirak etdiyi tədbirdə Azərbaycan Respublikası Prezidentinin köməkçisi − Prezident Administrasiyasının Hüquq mühafizə orqanları ilə iş şöbəsinin müdiri Fuad Ələsgərov, Prezident Administrasiyasının Qanunvericilik və hüquq siyasəti şöbəsinin müdiri, Azərbaycan Respublikasının Birinci vitse-prezidentinin köməkçisi Gündüz Kərimov, Ali Məhkəmə sədri İnam Kərimov, ədliyyə naziri Fərid Əhmədov, Xüsusi Rabitə və İnformasiya Təhlükəsizliyi Dövlət Xidməti rəisinin müavini Allahverən İsmayılov, Baş prokurorun xüsusi tapşırıqlar üzrə böyük köməkçisi İlqar Səfərov tərəfindən çıxışlar edib, Baş Prokurorluğun Cinayət təqibindən kənar icraatlar idarəsinin rəisi Elnur Musayev tərəfindən “Elektron prokurorluq” informasiya sisteminin təqdimatı olub.

Tədbirdə Azərbaycan Respublikasının Vəkillər Kollegiyasının sədri Anar Bağırov çıxış edərək iştirakçıları salamlayıb, konfransın işinə uğurlar arzulayıb, ARVK-da son illər elektron xidmətlər sahəsində görülən işlərdən, rəqəmsallaşdırma və müasir texnologiyaların tətbiqindən danışıb.

Sədr cənab Prezidentin “Azərbaycan Respublikasında vəkilliyin inkişafı ilə bağlı əlavə tədbirlər haqqında” 22 fevral 2018-ci il tarixli Sərəncamı ilə Kollegiyaya müasir İKT texnologiyalarından daha geniş istifadə olunması tövsiyənin icrası məqsədilə ARVK-nın “Elektron vəkillik” Komitəsi və “Elektron vəkil platforması”nın təsis olunduğunu, bu platforma çərçivəsində ilk olaraq bütün vəkil qurumlarının və vəkillərin onlayn reyestrinin yaradıldığını, o cümlədən buradakı bütün informasiyaların yenilənməsinin daim təmin edildiyini vurğulayıb.

Hər bir vəkil üçün “Elektron məhkəmə” informasiya sisteminə inteqrasiya olunmuş elektron vəkil kabinetinin fəaliyyətə başladığını deyən Anar Bağırov bu kabinetlər vasitəsilə vəkillərin “Davamlı tədris üzrə” elektron platformadan istifadə edərək distant qaydada kurslara qatıla bildiyini dilə gətirib.

Həmçinin, sədr bildirib ki, Kollegiyada dövlət hesabına göstərilən hüquqi yardımla bağlı qərarların mərkəzləşdirilmiş və onlayn qaydada bölgüsü həyata keçirilir, eyni zamanda, “Elektron vəkil orderi” istifadəyə verilib, bu platformanın davamı kimi, hazırda “Elektron vəkil sorğusu” layihəsi üzərində yekun işlər aparılır. ARVK-da süni intellektin imkanlarından da istifadə edilməsi istiqamətində işlər aparıldığını söyləyən Anar Bağırov yaxın zamanda “Elektron vəkillik” Komitəsi tərəfindən hazırlanan “Pro Bono” chat botunun fəaliyyətə başlayacağını qeyd edib.

Sədr çıxışının davamında cinayət prosesinin iştirakçıları arasında qarşılıqlı əlaqə üçün vahid onlayn xidmətinin yaradılması təklifini irəli sürərək, cinayət prosesində müdafiə tərəfinin hüquqlarının təmin edilməsində rəqəmsal texnologiyalardan istifadə problemlərini də diqqətdə saxlanılmalı olduğunu nəzərə çatdırıb.

Daha sonra konfrans iştirakçıları tərəfindən ibtidai araşdırmanın elektron qaydada həyata keçirilməsi ilə əlaqədar Azərbaycan Respublikasının Cinayət-Prosessual Məcəlləsində və digər qanunvericilik aktlarında əlavə və dəyişikliklər edilməsi və mərhələli şəkildə elektron cinayət təqibinin tətbiqi, ibtidai araşdırmanın elektron qaydada həyata keçirilməsi ilə əlaqədar cinayət prosesi iştirakçılarının və cinayət prosesində iştirak edən digər şəxslərin prosessual hüquqlarının və ibtidai araşdırmanın elektron qaydada həyata keçirilməsi zamanı informasiya təhlükəsizliyinin təmin edilməsi, elektron cinayət prosesinə keçidlə əlaqədar aidiyyəti qurumların əməkdaşlarının bu sahədə peşəkarlığının, bilik, bacarıq və vərdişlərinin artırılması və digər aktual məsələlər geniş müzakirə edilib.