Cari ilin aprel ayının 26-da Lənkəran şəhərində Azərbaycan Respublikasının Vəkillər Kollegiyası (ARVK) və Birləşmiş Millətlər Təşkilatının Uşaq Fondunun (UNİCEf) Azərbaycandakı nümayəndəliyinin birgə təşkilatçılığı ilə “Uşaqyönümlü hüquqi yardım (Uşaqların hüquqlarının cinayət, inzibati və mülki instansiyalarda müdafiəsində vəkilin fəaliyyəti)” mövzusunda növbəti təlim keçirilib.

Təlimdə UNİCEF-in eksperti, Vəkillər Kollegiyasının üzvü, hüquqşünas-təlimçi Rafiq Alışov uşaqyönümlü hüquqi yardım sahəsində beynəlxalq standartlar və mexanizmlər, uşaqyönümlü hüquqi yardımın sosial-psixoloji aspektləri və bu sahədə praktiki fəaliyyət barədə məruzələr edib.

Lənkəran, Astara və Masallı vəkil bürolarında fəaliyyət göstərən 14 vəkil və UNİCEF-in Lənkəran Reabilitasiya Mərkəzinin sosial işçilərinin qatıldığı təlimdə Azərbaycanda və xarici ölkələrdə yuvenal ədliyyə təcrübəsinin müqayisəli təhlili və respublikamızda cinayət yaşı üzrə müzakirələr aparılıb, uşaqyönümlü hüquqi yardım sahəsində rəhbər prinsiplər, eyni zamanda, təhqiqat, ibtidai istintaq və məhkəmə orqanlarında uşaqyönümlü hüquqi yardıma dair vəkillərin fəaliyyəti müzakirə edilib.

Sonda vəkillərin uşaq hüquqları sahəsində sualları cavablandırılıb, təlimdə iştirak edən vəkillərə sertifikatlar təqdim olunub və xatirə şəkli çəkilib.