Ümummilli Lider Heydər Əliyevin anadan olmasının 101 illiyi münasibətilə Azərbaycan Respublikasının Vəkillər Kollegiyası (ARVK) tərəfindən respublika ərazisində növbəti dəfə pulsuz hüquqi yardım aksiyasının keçirilməsi ilə bağlı “Açıq qapı” günü elan edilib.

Bununla bağlı olaraq mayın 10-da Bakı şəhəri “Mərkəz” Vəkil Bürosu, “Pro Bono” Vəkil Bürosu, Sumqayıt Regional Vəkil Bürosu, Gəncə şəhər 1 saylı Vəkil Bürosu, o cümlədən Şəki Regional Vəkil Bürosu, Şirvan Regional Vəkil Bürosu və Astara rayon Vəkil Bürosunun vəkilləri vətəndaşlara pulsuz hüquqi yardım göstəriblər.

Belə ki, vəkillər tərəfindən 50-dən artıq vətəndaşa hüquqi məsləhətlər verilib, həmçinin müvafiq yazılı ərizələr tərtib edilib.

Vətəndaşlar tərəfindən edilən müraciətlərin əksəriyyəti inzibati işlər, mülkiyyət hüququ, hüquqi faktın müəyyən olunması, pensiya təminatı, kredit mübahisəsi, mənzil təminatı və digər sosial məsələlərlə bağlı olub.

Sonda vətəndaşlar göstərilən hüquqi yardımdan məmnunluqlarını ifadə ediblər.