Azərbaycan Respublikasının Vəkillər Kollegiyasının (ARVK) sədri Anar Bağırovun başçılıq etdiyi nümayəndə heyəti Naxçıvan Muxtar Respublikasında (NMR) rəsmi səfərdə olub.

Cari ilin 7-8 may tarixlərində Ulu Öndər Heydər Əliyevin 101 illiyi və NMR-in 100 illiyi çərçivəsində, ARVK tərəfindən təşkil olunmuş silsilə tədbirlər zamanı, III "Yüksəliş" müsabiqəsinin qalibi İbrahim Məmmədzadə konfransda, Naxçıvan ASAN Vəkil Bürosunun açılışında, pulsuz hüquqi yardım aksiyasında və vəkilliyə namizədlərin təntənəli and içmə mərasimində iştirak edib.

Mayın 8-i ilk olaraq Ulu Öndər Heydər Əliyevin abidəsi və muzeyi ziyarət edilib, daha sonra “Blokada şəraitində hüquq təsisatlarının səmərəli fəaliyyəti və insan haqlarının müdafiəsi” mövzusunda keçirilmiş konfransda İbrahim Məmmədzadə “Naxçıvanın inkişaf potensialı” mövzusunda təqdimatla çıxış edib.

O, Dövlət Proqramı çərçivəsində GZİT (SWOT) təhlili və dünyadakı bənzər strateji şəhərlərin müqayisəli göstəricilərini təqdim edərək potensial inkişaf yollarını qeyd edib.

Tədbirdə NMR-də Prezidentin səlahiyyətli nümayəndəsi Fuad Nəcəfli, Ali Məhkəmənin sədri Səadət Bəktaşi, Prokuror Sənan Paşayev, Ədliyyə Naziri vəzifələrini müvəqqəti icra edən Hüseyn Səfərov, digər qurum rəhbərləri, deputatlar, vəkillər və başqa rəsmilər çıxış və iştirak ediblər.

Səfər zamanı Şahbuz, Ordubad, Babək rayonlarının tarixi, gəzməli-görməli yerlərinə ziyarət edilib, daha sonra mədəni proqram təşkil olunub.