16-18 may 2024-cü il tarixlərində Türkiyənin Balıkesir Universitetinin təşkilatçılığı ilə 10-a yaxın xarici təhsil müəssisələrini birləşdirən İnzibati hüquq və inzibati yurisdiksiyaya dair beynəlxalq simpozium keçirilib.

Simpoziumda onlayn çıxış edən Azərbaycan Respublikası Vəkillər Kollegiyasının Akademiyasının rektoru, hüquq elmləri doktoru, professor Əmir Əliyev Azərbaycan Respublikası Vəkillər Kollegiyasının (ARVK) sədri Anar Bağırovun adından iştirakçıları salamlayıb, təşkilatçılara, xüsusən Balıkesir Universitetinin rektoru professor Yücel Oğurluya öz təşəkkürünü bildirib.

Hüquq təhsili, insan hüquqlarının müdafiəsi və informasiya mübadiləsi sahəsində Türkiyə və Azərbaycan əməkdaşlığı barəsində ətraflı şərh verən Əmir Əliyev simpoziumun əhəmiyyətini xüsusi olaraq qeyd edib.

İnformasiya sahəsində məlumatlılıq və maarifləndirmə işinin hüquqi aspektlərini şərh edən ARVK-nın İxtisas Komissiyasının sədri, hüquq elmləri doktoru Turqay Hüseynov və Bakı Dövlət Universitetinin (BDU) Hüquq fakültəsinin İnsan hüquqları və informasiya hüququ UNESCO kafedrasının müəllimi, hüquq üzrə fəlsəfə doktoru Gülnaz Rzayeva internet əlyetərliyinin hüquqi təminatlarına dair tezislə çıxış edib.

Simpoziumda BDU-nun Hüquq fakültəsinin dekanı Zaur Əliyev, İnsan hüquqları və informasiya hüququ UNESCO kafedrasının müəllimi Əkbər Əliyev də iştirak ediblər.

Simpoziumun bir bölümü üzrə moderatoru BDU-nun Hüquq fakültəsinin dekanı Z.Əliyev olub.

Balıkesir Universitetinin rektoru professor Y.Oğurlu ARVK və BDU-nun Hüquq fakültəsinə əməkdaşlığa və tədbirdə iştiraka görə öz minnətdarlığını bildirib.