Cari ilin may ayının 18-də Azərbaycan Respublikası Vəkillər Kollegiyası Akademiyasının təşkilatçılığı ilə kibercinayətkarlıq sahəsində “Rəqəmsallaşma və cinayət prosesi” adlı növbəti əyani təlim keçirilib.

Təlimdə açılış nitqi ilə çıxış edən Vəkillər Kollegiyası Akademiyasının rektoru, h.e.d., professor Əmir Əliyev iştirakçıları Kollegiyanın Rəyasət Heyətinin sədri Anar Bağırovun adından salamlayaraq onlara uğurlar arzulayıb. Professor çıxışında kibercinayətkarlıqla mübarizənin Kollegiyanın diqqət mərkəzində olduğunu vurğulayıb, bu istiqamətdə həyata keçirilən maarifləndirmə tədbirlərindən söz açıb.

Təlimin əsas hissəsində Vəkillər Kollegiyasının üzvü, Kollegiya yanında Kibercinayətkarlıq və Kibertəhlükəsizlik Komitəsinin sədri, h.ü.f.d., “Kibercinayətkarlıq və Kibertəhlükəsizlik Komitəsi”nin sədri, “Cybercrime Consulting” MMC-nin təsisçisi Asif Mustafayev tərəfindən “İnternet informasiya texnologiyaları, əməliyyat axtarış və istintaq tədbirləri”, “Elektron sübut problemi” mövzularında məruzələr edilib, müvafiq sahədə vəkillərin sualları cavablandırılıb, müxtəlif kazuslar təhlil edilib.

Təlimdə Vəkillər Kollegiyasının ümumilikdə 22 üzvü iştirak edib.