Cari ilin iyul ayının 27-də Vəkillər Kollegiyasının təşkilatçılığı ilə “İdman mübahisələrində vəkilin iştirakı” mövzusunda distant təlim keçirilib.

 

Təlimdə açılış nitqi ilə çıxış edən Vəkillər Kollegiyası Akademiyasının rektoru Əmir Əliyev təlim iştirakçılarını Kollegiyanın sədri Anar Bağırovun adından salamlayıb və təlim mövzusunun aktuallığı və yeniliyi ilə bağlı xüsusi məqamlara toxunaraq onlara uğurlar arzulayıb.

 

Təlimdə Vəkillər Kollegiyasının və Beynəlxalq İdman Hüquqşünasları Assosiasiyasının üzvü Fərid Haqverdiyev tərəfindən idman mübahisələrini həll edən orqanlar, onların funksiyaları, o cümlədən idman mübahisələrində vəkilin rolu və vəkillərin qarşılaşdıqları problemlər mövzusunda məruzələr edilib.

 

Həmçinin təlimçi idman mübahisələrində vəkilin iştirakına dair çoxsaylı sualları cavablandırıb, vəkillərin cavablandırdığı sorğunun nəticələri təhlil olunub.

 

Təlimin sonunda Vəkillər Kollegiyasının Rəyasət Heyətinin üzvü, “Şamaxı” Futbol Klubunun İdarə Heyətinin sədri Elçin Usub təlimçini uğurlu keçən təlim münasibəti ilə təbrik edib və təlimin mövzusu ilə bağlı öz təcrübəsinə söykənən təcrübə və tövsiyələrini təlim iştirakçıları ilə bölüşüb.

 

Təşkil olunmuş distant təlimdə Vəkillər Kollegiyasının ümumilikdə 70 üzvü iştirak edib.