Cari il dekabrın 24-də Maliyyə Monitorinqi Xidməti (MMX) tərəfindən hüquq mühafizə və nəzarət orqanları üçün onlayn təlim təşkil olunub.

Təlimdə Beynəlxalq əməkdaşlıq şöbəsinin rəisi Arzu Xəlilova öz təqdimatı zamanı beynəlxalq əməkdaşlıq sahəsində müasir yanaşmalar, məlumat mübadiləsi üsulları və sərhədlərarası əməkdaşlıq mexanizmləri haqqında geniş məlumat verib.

Təlimin beynəlxalq əməkdaşlıq, məlumat və sənədlərin mübadiləsi adlı birinci sessiyasında sərhədlərarası əməkdaşlıq imkanları və effektiv mübadilə üsulları barədə məlumatlar auditoriyanın diqqətinə çatdırılıb.

Təlimçi MMX-nin qeyri-formal əməkdaşlıq kanalları və əmlakın son təyinat nöqtəsi barədə məlumat mübadiləsi adlı ikinci hissədə qeyri-formal əməkdaşlıq vasitələrinin effektivliyi və əmlakın izlənilməsi üzrə öz praktik təcrübələrini iştirakçılarla bölüşüb.

Eyni zamanda təlimdə müxtəlif adlardan istifadə edilərək benefisiar mülkiyyətçinin gizlədilməsi mexanizmləri və bu cür halların qarşısını almaq üçün tətbiq olunan innovativ yanaşmalar müzakirə olunub.

Hüquq mühafizə və nəzarət orqanlarından, Vəkillər Kollegiyasının üzvlərindən, eləcə də öhdəlik daşıyan şəxslərdən 80 nümayəndənin iştirak etdiyi təlim aktiv sual-cavab sessiyası ilə yekunlaşıb.