Aprelin 22-də Vəkillər Kollegiyası Akademiyasının təşkilatçılığı ilə "Hakim və vəkil münasibətlərində etik çərçivələr" mövzusunda distant formada təlim keçirilib.

Təlimdə açılış nitqi ilə çıxış edən Vəkillər Kollegiyası Akademiyasının elmi katibi Sona Xəlilli iştirakçıları Kollegiyanın rəhbərliyi adından salamlayıb və təlim mövzusunun praktiki əhəmiyyəti ilə bağlı məqamları qeyd edib.

Təlimin əsas hissəsində Vəkillər Kollegiyası Vəkillərin İntizam Komissiyasının üzvü, Deontologiya Komitəsinin sədri Paşa Səfərov hakim - vəkil münasibətləri, hüquqi etika, məhkəmə davranış kodeksi, hüquq sahəsində etik çərçivə, müəyyən edilmiş etik normalar və digər müxtəlif məsələlər barədə geniş çıxış edib.

Daha sonra vəkillər mövzu üzrə öz təcrübələrinə əsaslanaraq fikirlərini bölüşüblər.

Yekunda vəkillərin müvafiq sahədə çoxsaylı sualları cavablandırılıb.

Qeyd edək ki, təlimdə vəkillər və Deontologiya Komitəsi ilə əməkdaşlıq edən könüllülər də daxil olmaqla, 48 nəfər iştirak edib.