Məlum olduğu kimi, bu ilin əvvəlində Azərbaycan Respublikası Vəkillər Kollegiyası Rəyasət Heyətinin qərarı ilə vəkillərdən ibarət olan “Advokat” futbol komandası formalaşdırılmış və hazırda həmin komanda bir sıra regional və beynəlxalq səviyyəli futbol turnirlərində uğurla iştirak etməkdədir.

Qeyd olunan turnirlərdən biri bu günlərdə Ukraynanın Kiev şəhərində baş tutmuşdur. Belə ki, oktyabrın 24-28-də Ukrayna Vəkillər Kollegiyasının təşkilatçılığı ilə vəkillər arasında beynəlxalq futzal üzrə turnir keçirilmişdir.

Qeyd olunmalıdır ki, turnirin favoritləri arasında vəkillər arasında futzal üzrə dünya çempinou KRBA (Kiev Regional Vəkillər Kollegiyası) da yer almışdır. 3 gün davam edən gərgin oyunlar nəticəsində Azərbaycan Respublikası Vəkillər Kollegiyasının “Advokat” futbol komandası bütün rəqiblərini yenərək turnirin qalibi olmuşdur.

Bu kimi tədbirlərin müxtəlif ölkələrin vəkillər kollegiyaları arasında əlaqələrin gücləndirilməsində rolu və Azərbaycan vəkilliyinin xaricdə tanıdılmasında əhəmiyyəti nəzərə alınaraq səfərin təşkili və vəkillərimizin turnirdə iştirakı sponsorlar hesabına təmin edilmişdir.

"Advokat" futbol komandası hazırda həm futzal üzrə 2-ci liqada, həm də Bakı futbol liqasında mübarizə aparır.

Mütləq qələbə münasibətilə Azərbaycan Respublikasının Vəkillər Kollegiyası “Advokat” futbol komandasının bütün üzvlərini uğurlu oyunlarına görə təbrik edir və komandaya yeni-yeni nailiyyətlər arzu edir.