Oktyabrın 18-də Vəkillər Kollegiyası Tədris Mərkəzinin təşkilatçılığı ilə "Vəkillik psixologiyası" mövzusunda əyani qaydada interaktiv təlim keçirilib.

Təlimdə açılış nitqi ilə çıxış edən hüquq elmləri doktoru, professor Əmir Əliyev iştirakçıları salamlayıb və mövzunun aktuallığı ilə bağlı məsələlərə toxunub. Qeyd olunub ki, vəkillik psixologiyası həm vəkillərin peşəkar fəaliyyətinin effektivliyini artırmaq, həm də onların şəxsi rifahını təmin etmək baxımından mühüm əhəmiyyətə malikdir.

Həmçinin “Azərbaycan vəkili” elmi-praktik hüquq jurnalının yeni - “Konstitusiya və Suverenlik İli”nə həsr edilmiş xüsusi buraxılışı iştirakçılara təqdim olunub, jurnalın elmi-hüquqi əhəmiyyəti onların diqqətinə çatdırılıb.

Təlimin əsas hissəsində ədliyyə müşaviri, kliniki (tibbi) psixoloq Vidadi Mayıl vəkillik psixologiyasının predmeti, psixi proseslər və vəziyyətlər, vəkilin psixoloji portreti, ünsiyyət psixologiyası və mövzu üzrə digər əlaqəli məsələlər barədə geniş çıxış edib.

Təlim interaktiv formada davam edib və sonda vəkillərin müvafiq sahədə çoxsaylı sualları cavablandırılıb.

Qeyd edək ki, təlimdə Vəkillər Kollegiyasının 33 üzvü iştirak edib.