Azərbaycan Respublikasının Vəkillər Kollegiyası (VK) və Azərbaycan Respublikasının Ədliyyə Nazirliyinin Ədliyyə Akademiyasının birgə əməkdaşlığı ilə vəkillər üçün növbəti ixtisasartırma təlimləri keçirilib.

Belə ki, oktyabrın 22-də “Məhkəmədə vəkilin hüquqları və vəzifələri” mövzusunda distant qaydada keçirilən təlimdə VK-nın İntizam Komissiyasının üzvü, “Kəngərli və partnyorları” Vəkil Bürosunun müdiri İsmayıl Kəngərli təlimçi qismində çıxış edib.

Təlimdə vəkilin hüquq və vəzifələrinin bölgüsü, məhkəmədə və təmsil etdiyi şəxslərə münasibətdə vəkilin hüquq və vəzifələri, vəkilin itihamın mahiyyətini bilməsi hüququ, vəkilin müdafiə etdiyi şəxslə ünsiyyət saxlamaq hüququ, vəkilin vəzifələri, etik davranış qaydalarına əməl etməsi  və digər məsələlər ətrafında geniş müzakirələr aparılıb.

Oktyabrın 23-də “Əqdlərin etibarsızlığı” mövzusunda distant qaydada təşkil olunan digər təlimdə isə Kollegiyanın üzvü Vamiq Şükürov təlimçi qismində çıxış edib.

Təlimdə əqdlərin etibarlılığı və etibarsızlığı qaydaları, əqdin etibarlı olma şərtləri, əqdin forma tələblərinə əməl olunması, tərəflərin iradə ifadəsinin düzgünlüyü, əqdin etibarsızlığna görə növləri, mübahisələndirilən əqdlər, iradə qüsurlarına görə əqdlərin etibarsızlığı və digər əlaqəli məsələlər müzakirələr edilib.

Oktyabrın 24-də “Avropa İnsan Hüquqları Məhkəməsinin qərarları işığında şikayətin qəbul edilənlik şərtləri” mövzusunda təşkil olunmuş növbəti distant təlimdə Kollegiyanın üzvü Sadiq Bağırov təlimçi qismində çıxış edib.

Təlimdə şikayətin mahiyyəti ilə bağlı qəbuledilənlik şərtləri, ölkədaxili hüquq-müdafiə vasitələrinin tükəndirilməsi, tükəndirmə öhdəliyindən azad olma, anonim şikayət, müraciət hüququndan sui-istifadə, yurisdiksiya üzrə şərtlər, mahiyyət şərtləri və digər müvafiq məsələlər təhlil olunub.

Ümumilikdə 120 vəkilin iştirak etdiyi təlimlərin sonunda iştirakçıların müxtəlif sualları cavablandırılıb.