Noyabrın 15-də Vəkillər Kollegiyası Tədris Mərkəzinin təşkilatçılığı ilə “Uşaq Hüquqları Aylığı” çərçivəsində “Sığorta ödənişindən imtinanın hüquqi əsasları və məhkəmə təcrübəsi” mövzusunda əyani qaydada interaktiv təlim keçirilib.

Təlimdə açılış nitqi ilə çıxış edən Vəkillər Kollegiyası Tədris Mərkəzinin elmi katibi Sona Xəlilli iştirakçıları salamlayıb və təlim mövzusunun aktuallığı ilə bağlı məsələləri qeyd edib. Qeyd olunub ki, sığorta ödənişlərindən imtina məsələləri yalnız kommersiya mübahisəsi olmaqla qalmır, həm də hüquqi baxımdan şəxsin konstitusion hüquqlarını və dövlətin suverenliyini qorumağa xidmət edir.

Həmçinin “Azərbaycan vəkili” elmi-praktik hüquq jurnalının yeni - “Konstitusiya və Suverenlik İli”nə həsr edilmiş xüsusi buraxılışı iştirakçılara təqdim olunub.

Təlimin əsas hissəsində Vəkillər Kollegiyasının üzvü, “Presedent” Vəkil Bürosunun vəkili, Kənd Təsərrüfatı Nazirliyi tabeliyində “Aqrar tədarük və təchizat” ASC-nın baş hüquqşünası Günay Musayeva sığorta müqaviləsinin mahiyyəti, sığortalının qəsdi nəticəsində vurulmuş zərər, sığorta təminatında məhdudiyyətlər və digər imtina halları barədə ətraflı çıxış edib.

Təlim interaktiv formada davam edib və sonda vəkillərin müvafiq sahədə müxtəlif sualları cavablandırılıb.

Qeyd edək ki, təlimdə Vəkillər Kollegiyasının 29 üzvü iştirak edib.