Bakıda Azərbaycan Hakimlərinin II Forumunun açılış mərasimi keçirilib.

500-dək məhkəmə hakiminin, Məhkəmə-Hüquq Şurası üzvlərinin, həmçinin dövlət qurumlarının nümayəndələrinin iştirak etdiyi forumun məqsədi hüquq ictimaiyyətini və cəmiyyəti ölkəmizdə gedən məhkəmə-hüquq islahatları barədə məlumatlandırmaqdır.

Forumda əvvəlcə məhkəmə sahəsində 2025-ci il ərzində görülən işlərə dair video-çarx nümayiş etdirilib. 

Azərbaycan Hakimlər İttifaqının sədri Ramiz Rzayev açılış nitqində bildirib ki, bugünkü forum Azərbaycan məhkəmə hakimiyyəti üçün xüsusi məna və əhəmiyyət daşıyır.

Ali Məhkəmənin və Məhkəmə-Hüquq Şurasının sədri İnam Kərimov çıxışında bildirib ki, birinci forumdan ötən dövr ərzində ölkəmizdə bir sıra əlamətdar hadisələr baş verib, inkişaf dinamikası uğurla davam etdirilib, genişmiqyaslı quruculuq və bərpa işləri aparılıb, bütün sahələrdə tərəqqiyə nail olunub.

Konstitusiya Məhkəməsinin sədri Fərhad Abdullayev isə çıxışında qeyd edib ki, Konstitusion şərh hüquqi müəyyənliyin və qanunun aliliyinin təmin edilməsində mühüm rol oynayır.

Açılış mərasiminin sonunda Azərbaycan Hakimlərinin II Forumu çərçivəsində məhkəmə-hüquq sistemində uzunmüddətli səmərəli fəaliyyətinə, həmçinin çıxardıqları məhkəmə qərarlarının sabitlik göstəricilərinə görə bir qrup hakim təltif edilib.

Sonra tədbir konkret mövzular üzrə panel müzakirələrlə davam etdirilib.

Qeyd edək ki, Forumda Vəkillər Kollegiyasının (VK) sədri Anar Bağırov, VK sədrinin müavini Aydın Axundov və Kollegiyanın Rəyasət Heyətinin üzvü İlhamə Həsənova iştirak edib. 

“Cinayət mühakiməsinin aktual problemləri və müasir çağırışlar” mövzusunda keçirilən panel müzakirələrdə VK Rəyasət Heyətinin üzvü İlhamə Həsənova  çıxış edərək müdafiə institutu nəzərindən ədalət mühakiməsinin bir sıra aktual məsələlərini diqqətə çatdırdıb. O, çıxışda xüsusilə aşağıdakı məsələlər vurğulayıb.

●        Cinayət təqibinin ilkin mərhələsində müdafiə hüququnun real təmin olunmaması – şəxslərin şahid qismində dindirilməsi zamanı müdafiəsiz sorğu-sual edilməsi və həmin izahatların sonradan sübut kimi istifadə olunması problemi; müdafiə hüququnun formal statusdan deyil, faktiki vəziyyətdən irəli gəlməli olduğu qeyd edildi. 

●        Rəqəmsal sübutlar sahəsində müdafiə tərəfin imkanlarının məhdudluğu – sübutların əldə olunması və ekspertiza mərhələsində alternativ ekspertiza imkanlarının praktik çətinlikləri ədalətli məhkəmə araşdırması baxımından risk kimi qiymətləndirildi. 

●        Həbs qətimkan tədbirinin faktiki avtomatlaşdırılması – ağır və xüsusilə ağır cinayətlər üzrə alternativ qətimkan tədbirlərinin kifayət qədər tətbiq edilməməsi fərdiləşdirmə prinsipinə uyğun olmadığı bildirildi. 

●        Vəkillərin təhlükəsizliyi məsələsi – Azərbaycan Respublikasının Cinayət Məcəlləsi-nin 288-ci maddəsində vəkil anlayışının ayrıca göstərilməməsinin praktiki boşluqlar yaratdığı qeyd olundu. 

●        Dövlət hesabına və müqavilə əsasında paralel müdafiəçilik halları – bunun müdafiənin effektivliyinə və dövlət büdcəsinə təsirləri diqqətə çatdırıldı. 

Qeyd edildi ki, müdafiə hüququnun effektiv təmin olunması cinayət mühakiməsinin ədalətliliyinin əsas şərtidir və bu sahədə institusional yanaşmanın gücləndirilməsi zəruridir.