Azərbaycan Dillər Universitetində (ADU) “Rəqəmsal Dövrdə Hüquq və Mənəvi Təhlükəsizlik: Narkomaniya və Zərərli Kontentə Qarşı Hüquqi Mexanizmlər” mövzusunda elmi-praktik panel keçirilib.

Tədbiri giriş sözü ilə İngilis və Fransız Dilləri fakültəsinin dekanı, dosent Vəfa Babayeva açaraq müasir rəqəmsallaşma proseslərinin yaratdığı yeni çağırışlar fonunda gənclərin informasiya təhlükəsizliyi, hüquqi məsuliyyəti və milli-mənəvi dəyərlərin qorunmasının prioritet məsələlərdən biri olduğunu bildirib. O, ali təhsil müəssisələrində hüquqi maarifləndirmə və preventiv tədbirlərin sistemli şəkildə həyata keçirilməsinin əhəmiyyətini vurğulayıb.

Panelin moderatoru, Azərbaycan Vəkillər Kollegiyası Rəyasət Heyətinin üzvü İlhamə Həsənova rəqəmsal mühitdə hüquqi məsuliyyət və mənəvi təhlükəsizlik məsələlərini geniş təhlil edib. O, sosial şəbəkələrdə rast gəlinən hüquq pozuntularına dair konkret praktik nümunələr təqdim edərək mövcud qanunvericiliyin tətbiq mexanizmlərini izah edib, real hüquqi situasiyalar əsasında maarifləndirici açıqlamalar verib.

Paneldə çıxış edən Azərbaycan Vəkillər Kollegiyası Rəyasət Heyətinin üzvləri Lalə Nağıyeva ilə Dilarə Əfrasiyabova (Qadın Vəkil Alyansının sədri) narkomaniya ilə mübarizədə hüquqi mexanizmlər, zərərli kontentin yayılmasının hüquqi nəticələri, həmçinin vəkillərin ictimai maarifləndirmədə rolu barədə ətraflı məlumat veriblər. Çıxışlarda hüquqi savadlılığın artırılmasının cəmiyyət üçün preventiv əhəmiyyət daşıdığı qeyd olunub.

Həmçinin ADU-nun psixologiya müəllimi Səadət Nəbiyeva çıxış edərək mövzuya psixoloji aspektdən yanaşıb. O, rəqəmsal mühitin gənclərin davranış modellərinə təsiri, sosial şəbəkə asılılığı, aqressiv kontentin psixoloji nəticələri və profilaktik psixoloji dəstəyin əhəmiyyəti barədə fikirlərini bölüşüb. Bildirilib ki, hüquqi mexanizmlərlə yanaşı, psixoloji maarifləndirmə və emosional dayanıqlılığın formalaşdırılması da təhlükəsiz rəqəmsal mühitin əsas şərtlərindən biridir.

Müzakirələr zamanı rəqəmsal dövrdə: ictimai mənəviyyata zidd məlumatların yayılmasının qarşısının alınması, əxlaqa zidd ifadə və davranışların hüquqi qiymətləndirilməsi, milli-mənəvi dəyərlərə zidd kontentə görə hüquqi məsuliyyət mövzuları ətrafında geniş hüquqi və psixoloji təhlillər aparılıb. Həmçinin Prezident cənab İlham Əliyev tərəfindən təsdiqlənmiş “İnformasiya, informasiyalaşdırma və informasiyanın mühafizəsi haqqında” Qanuna edilmiş dəyişikliklər kontekstində normativ-hüquqi mexanizmlər iştirakçıların diqqətinə çatdırılıb.

Tədbir interaktiv sual-cavab sessiyası ilə davam edib, tələbələr və iştirakçılar tərəfindən səsləndirilən suallar ətrafında geniş fikir mübadiləsi aparılıb.

Panel hüquqi və psixoloji yanaşmaların vəhdəti əsasında gənclərin rəqəmsal təhlükəsizlik sahəsində məlumatlılığının artırılması və sağlam sosial mühitin formalaşdırılması baxımından mühüm əhəmiyyət kəsb edib.