Azərbaycan Respublikası Vəkillər Kollegiyası (VK) və Avropa Gənc Vəkillər Assosiasiyasının (EYBA) birgə təşkilatçılığı ilə keçirilən EYBA-nın payız konfransının (“EYBA Autumn Conference 2026”nın iştirakçıları Müslüm Maqomayev adına Azərbaycan Dövlət Akademik Filarmoniyasında təşkil olunan konsert proqramında iştirak ediblər.

Tədbirdə Kollegiyanın və EYBA-nın rəhbərlikləri, yerli və xarici vəkillər, hüquqşünaslar iştirak ediblər.

Qonaqlar Qara Qarayev adına Azərbaycan Dövlət Kamera Orkestrinin ifasında Azərbaycan və dünya klassik musiqisinin nümunələrini dinləyiblər.

Əməkdar artist Əyyub Quliyevin dirijorluğu ilə təqdim olunan proqramda Aqşin Əlizadənin “Cəngi”, Üzeyir Hacıbəylinin “Sevgili canan”, Vasif Adıgözəlovun “Bayram süitası”, Arif Məlikovun “İki qəlbin dastanı” baletindən “Komdenin arzuları” və “Məhəbbət əfsanəsi” baletindən “Türk qızlarının rəqsi”, Azər Rzayevin “Düşüncə” və “Qaytağı”, Antonio Vivaldinin “İlin fəsilləri” silsiləsindən “Yay”, Astor Piazzollanın “Libertango”, Rodolfo Falvonun “Dicitencello vujo”, Fərhad Bədəlbəylinin “Dəniz”, Musa Mirzəyevin “Azərbaycan rəqsi”, Qara Qarayevin “Yeddi gözəl” baletindən “Vals”, Fikrət Əmirovun “Min bir gecə” baletindən “Şəhrizadın bayramı” və Müslüm Maqomayevin “Odlar yurdu” əsərləri səsləndirilib.

Solistlər Vəkillər Kollegiyasının üzvü Araz Əsədli, Orxan Cəlilov, Mirxalid Məmmədzadə, Səxavət Məmmədov və Aydan Yeşildağ orkestrin müşayiəti ilə çıxış edərək qonaqlara xoş musiqi anları yaşadıblar.

Konsert proqramının ardından konfrans iştirakçıları üçün şam yeməyi təşkil olunub.