Məlum olduğu kimi, ötən ilin əvvəlindən etibarən Azərbaycan Respublikası Vəkillər Kollegiyasının üzvlərindən ibarət futbol komandaları bir sıra regional və beynəlxalq səviyyəli futbol turnirlərində uğurla iştirak etməkdədirlər.

Komandalardan biri olan "Advokat" hazırda həm Azərbaycan futzal çempionatının 2-ci liqasında, həm də Bakı futbol liqasında mübarizə aparır. Vəkillər Kollegiyasının yığması Litvanın Vilnus şəhərində keçirilmiş və Litva Vəkillər Kollegiyasının təşkil etdiyi, həmçinin Şərqi Avropa və bir sıra MDB ölkələrin vəkillər kollegiyalarının futbol komandalarının qatıldığı beynəlxalq futbol turnirində fəxri 3-cü yeri, "Advokat" komandası isə Ukrayna Vəkillər Kollegiyasının təşkilatçılığı ilə vəkillər arasında keçirilmiş beynəlxalq futzal üzrə turnirdə 1-ci yeri tutmuşdur.

Qeyd olunan ənənənin davam etdirilməsi, o cümlədən vəkil qurumları və vəkillər arasında kollektiv ruhun və qarşılıqlı münasibətlərin daha da möhkəmləndirilməsi məqsədilə ilk dəfə olaraq vəkillər arasında birinci futbol turniri keçirilmişdir.

08.12.2018-02.02.2019 tarixlərində keçirilmiş turnirdə 8 komanda – “11 saylı Vəkil Bürosu”, “16 saylı Vəkil Bürosu”, “Barrister”, “Veteranlar”, “Advokat”, “Sumqayıt”, “Abşeron” və “Ədalət” komandaları iştirak etmişdir.

Oynadığı bütün oyunlarda qalib gəlmiş “Advokat” komandası turnirin qalibi olmuş, “Abşeron” və “Ədalət” komandaları isə müvafiq olaraq ikinci və üçüncü yeri tutmuşlar. Turnirdə ümumilikdə 28 oyun keçirilmiş, 181 qol qeydə alınmışdır.

Turnirin ən çox qol vuran oyunçular 6 oyunda 15 qolla Turqay Babayev və 7 oyunda 15 qolla Rauf Əmiraslanov olmuşdur. Turnirdə ən uğurlu qapıçılar isə 5 oyunda 6 qol buraxan Elyar Həsənov və 5 oyunda 8 qol buraxan Yusif Xəmmədov olmuşdur. 

Dünən Vəkillər Kollegiyası rəhbərliyinin iştirakı ilə təntənəli surətdə turnirin bağlanış mərasimi keçirilmiş, turnirin qalibləri, o cümlədən fərdi olaraq fərqlənən oyunçular təltif edilmişlər.

Qeyd olunmalıdır ki, Vəkillər Kollegiyasının birinci futbol turniri Azərbaycan vəkilliyinin 100 illiyi münasibətilə keçiriləcək və müxtəlif ölkələrin vəkillərdən ibarət komandalarının iştirak edəcəyi beynəlxalq futbol turnirinə hazırlıq baxımından böyük əhəmiyyət kəsb etməkdədir.