Avropa Hüquqşünas Tələbələr Assosiasiyası (ELSA- European Law Students Association) Avropanın 44 ölkəsində 350-dən çox universiteti və 54500-dən çox hüquq tələbəsini özündə birləşdirən dünyanın ən böyük hüquq tələbələri təşkilatıdır.Əsası 1981-ci ildə qoyulan bu təşkilata Azərbaycan 2010-cu ilin oktyabr ayında Türkiyənin Alanya şəhərində keçirilən ELSA-nın 58-ci Beynəlxalq Şura Toplantısında müşahidəçi üzv, 1 il sonra – 2011-ci ilin oktyabr ayında İtaliyanın Palermo şəhərində Assosiasiyanın 60-cı Beynəlxalq Şura Toplantısında tam üzvlük qazanmışdır.

Qeyd olunmalıdır ki, tələbələr ELSA-nın geniş fəaliyyət və beynəlxalq əməkdaşlıq imkanları vasitəsilə beynəlxalq hüquq sistemləri barədə dəyərli biliklər və təcrübə əldə edir, beynəlxalq tədbirlərdə, seminarlarda iştirak etməklə özlərini zamanın tələbinə müvafiq şəkildə formalaşdırır və beləliklə hər bir Azərbaycanlı hüquq tələbəsi idarəetmə, qrup fəaliyyəti qabiliyyəti, praktiki iş təcrübəsi, Avropa dəyərlərini paylaşmaq və başqa imkanlardan faydalanırlar.

24-31 mart tarixlərində Bakı şəhərində ELSA-nın 75-ci Beynəlxalq Şura Toplantısı baş tutmuşdur. Toplantıda rəsmi qonaqlar və çıxışçılar qismində Dövlət Miqrasiya Xidmətinin rəisi Vüsal Hüseynov, Gənclər Fondunun icraçı direktoru Fərid Cəfərov, Korrupsiyaya qarşı mübarizə üzrə Komissiyasının katibi Kamal Cəfərov, Vəkillər Kollegiyasının Rəyasət Heyətinin Aparatının rəhbəri Fərhad Nəcəfov, Vətəndaşlara Xidmət və Sosial İnnovasiyalar üzrə Dövlət Agentliyin Aparat rəhbəri Azad Cəfərov iştirak etmişlər.

Səfər ərzində Avropanın 40 ölkəsindən (Almaniya, Fransa, İspaniya, Belçika, Niderland, Rusiya, Norveç və digərləri) 330 tələbə və gənc hüquqşünas tələbələr müxtəlif mədəni və sosial proqramlarda, habelə görüşlərdə iştirak etmişlər. Onlar xüsusilə, Heydər Əliyev Mərkəzinə səfər etməklə Azərbaycanın tarixi ilə bağlı məlumat əldə etmiş, həmçinin Ulu Öndər Heydər Əliyevin ölkəmizdə gördüyü quruculuq işləri barəsində məlumatlandırılmışlar. Həmçinin tədbirlər çərçivəsində iştirakçılar Beynəlxalq Muğam Mərkəzində milli muğam irsimiz haqqında məlumatlandırılmış və xanəndələr tərəfindən ifa olunan musiqilərə qulaq asmışlar.

Tədbir zamanı ELSA Hüquqşunaslar Şəbəkəsi ilə də bir sıra görüşlər baş tutmuşdur. Belə ki, avropalı hüquqşünaslar Ali Məhkəməyə səfər edərək orqanın inzibati binası ilə tanış olmuş, həmçinin Azərbaycanın konstitusiya quruluşu, məhkəmə sistemi barəsində məlumat əldə etmişlər.

Həmçinin hüquqşünaslar Azərbaycan Respublikası Kənd Təsərüfatı Nazirliyinə səfər etmiş, bu zaman onlar kənd təsərüfatı naziri İnam Kərimov tərəfindən qəbul olunmuş və bir sıra mövzularda müzakirələr aparmışlar.

Bundan əlavə, hüquqşünaslar İçərişəhər Dövlət Tarix-Mədəniyyət və Tarix Qoruğuna səfər etmişlər.