Oktyabr ayının 10-da Vəkillər Kollegiyasının rəhbərliyi aparılmış əsaslı təmirdən sonra Sumqayıt şəhəri 1 saylı Vəkil Bürosunun inzibati binası ilə tanış olmuşdur.
Vəkillər Kollegiyasının sədri Anar Bağırovu büroda aparılmış təmir işləri ilə tanış edən büronun müdiri Fazil Nəhmətov görülmüş işlər barədə məlumat vermiş, büronun vəkillərin fəaliyyəti üçün zəruri şəraitin təmin olunduğunu, görüş otaqlarının hazırlandığını, ayrıca müdir otağının, mətbəx və sanitar qovşaqların, büronun yeni kompüter, printer, mebel və digər avadanlıqlarla təchiz edildiyini bildirmişdir.
Təmir işlərinin bilavasitə dövlət vəsaiti hesabına aparılması nəzərə alınaraq bununla bağlı Azərbaycan Respublikasinin Şəhərsalma və Tikinti Məcəlləsinin, habelə tikinti-təmir sahəsini tənzimləyən digər hüquqi aktların tələblərinə uyğun olaraq inzibati bina üzrə görüləcək işlərin həcmi dəqiqləşdirilmiş və təmirlə əlaqədar ehtimal olunan qiymətlərin müəyyən edilməsi məqsədilə Vəkillər Kollegiyası tərəfindən müvafiq qaydada Azərbaycan Respublikası Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi Tikintidə Qiymətqoyma Mərkəzinə müraciətlər edilmişdir.
Tikintidə Qiymətqoyma Mərkəzinin həmin obyekt üzrə təqdim etdiyi hesabatlara əsasən inzibati binanın cari təmir işlərinin ƏDV daxil 44.077,82 manat təşkil etdiyi bildirilməsinə baxmayaraq, “Azərbaycan Respublikasında vəkilliyin inkişafı ilə bağlı əlavə tədbirlər haqqında” Azərbaycan Respublikasının Prezidentinin 22.02.2018-ci il tarixli Sərəncamı əsasında dövlət büdcəsindən Vəkillər Kollegiyasına ayrılmış vəsaitin təyinatı üzrə qənaətlə və daha da səmərəli şəkildə istifadəsinin təmin edilməsi məqsədilə cari təmir işlərinə ümumilikdə ƏDV daxil 23.399,40 manat vəsait xərclənmişdir. Eyni zamanda ayrılmış vəsait hesabına həmin vəkil bürosunun kompüter və printer avadanlıqları, kondisionerlə təmin edilməsi üçün ƏDV daxil 5620,93 manat vəsait xərclənmişdir.
Vəkillər Kollegiyasının sədri Anar Bağırov öz növbəsində büroda aparılmış işləri yüksək qiymətləndirmiş, əhaliyə yüksək keyfiyyətli və peşəkar hüquqi yardım göstərilməsi üçün vəkillərin iş şəraitinin və fəaliyyət göstərdikləri yerlərin yüksək standartlara cavab verməsinin əhəmiyyətini vurğulamış, bundan başqa Respublika ərazisində fəaliyyət göstərən bütün vəkil qurumlarının maddi-texniki vəziyyətinin yaxşılaşdırılması üzrə aparılan tədbirlər barəsində məlumat vermişdir.
Daha sonra, Sumqayıt şəhəri Heydər Əliyev Mərkəzində Vəkillər Kollegiyası Rəyasət Heyətinin üzvləri, vəkil qurumlarının rəhbərləri, həmçinin KİV nümayəndələrinin iştirakı ilə vəkilliyə namizədlərin təntənəli andiçmə mərasimi keçirilmişdir.
Tədbirdə açılış nitqi ilə çıxış edən Vəkillər Kollegiyasının sədri Anar Bağırov Azərbaycan vəkilliyinin yubiley tədbirləri barədə məlumat vermiş, bu tədbirlər çərçivəsində baş tutmuş konfrans, mədəni proqram, o cümlədən, keçirilmiş 1-ci Cənubi Qafqaz Vəkillərin Beynəlxalq Futbol Turnirinin yüksək səviyyədə təşkil olunduğunu, ölkəmizdə səfərdə olan xarici, eləcə də tədbirlərdə iştirak edən yerli qonaqların öz məmnunluqlarını dilə gətirdiklərini qeyd etmişdir.
Kollegiya sədri bildirmişdir ki, hazırda vəkilliyə qəbul üzrə ixtisas imtahanları davam edir, sənəd verən hüquqşünasların sayı günü-gündən artmaqdadır, bu gün and içəcək vəkilliyə namizədlərlə birlikdə ölkədə vəkillərin sayı 1635 nəfərə çatacaqdır.
Bundan əlavə tədbirdə qeyd olunmuşdur ki, Vəkillər Kollegiyası Rəyasət Heyətinin qərarı ilə "Azərbaycan vəkilliyinin 100 illiyi"nə həsr olunmuş "Yubiley döş nişanı" təsis olunmuş, Azərbaycan vəkilliyinin inkişafına və nüfuzunun artırılmasına verdikləri töhfələrə görə bir sıra şəxslərin döş nişanı ilə təltif edilməsi nəzərdə tutulmuşdur.
Tədbirdə Vəkillər Kollegiyası Rəyasət Heyətinin üzvləri, Vəkillər Kollegiyasının bir sıra üzvləri, o cümlədən, Vəkillər Kollegiyasının üzvü olmayan, lakin vəkilliyin inkişafında müstəsna rol oynayan şəxslər döş nişanları ilə təltif olunmuşlar.
Sonra vəkilliyə qəbul üzrə ixtisas imtahanlarını müvəffəqiyyətlə keçmiş və icbari təlimi başa vurmuş namizədlərin andiçmə mərasimi keçirilmiş, Azərbaycan Respublikasının dövlət himni səsləndirilmiş, vəkilliyə namizədlər Azərbaycan Respublikasının dövlət bayrağı önündə and içmiş, onlara vəsiqələr təqdim edilmişdir.
