2-ci Vəkil Futbol Liqası turniri Azərbaycan Respublikası Vəkillər Kollegiyasının Rəyasət Heyəti tərəfindən təsdiq edilmiş Əsasnamənin tələbləri çərçivəsində 2 noyabr 2019-cu il tarixdə başlamış və turnirin birinci dövrəsi 18 yanvar 2020-ci il tarixdə bitmişdir.

Turnirin birinci dövrəsində vəkil və yalnız qapıçı qismində iştirak edən hüquqşünaslardan ibarət 9 komanda iştirak etmişdir.

Oyunlar AsFar şirkətinə məxsus Bakı Olimpiya Stadionu ətrafında, Böyükşor Bulvarında yerləşən suni örtüklü meydançalarda keçirilmişdir. Təşkilat Komitəsinin səyi nəticəsində oyunların idarə edilməsinə AFFA-nın 4 peşəkar hakimi dəvət edilmiş, hər oyunu eyni anda 2 hakim idarə etmişdir. Oyunlar TK tərəfindən təqdim edilmiş peşəkar “Joma” markalı toplarla oynanılmışdır. Həmçinin vurğulanmalıdır ki, TK tərəfindən oyunların foto və videoçəkilişi təşkil edilmiş, fotoların keyfiyyəti və kəmiyyəti komandalar tərəfindən bəyənilmiş, videoyazılar isə YouTube internet portalında yerləşdirilmişdir. Oyunları YouTube vasitəsi ilə istənilən vaxtda izlənilə bilməsi iştirakçılar tərəfindən xüsusi alqışlanmışdır. Bundan başqa, qeyd olunmalıdır ki, oyunların gedişatı zamanı meydançada bütün lazımi tibbi ləvazimatı ilə təchiz edilmiş peşəkar həkim olmuşdur.

Turnirdə, vəkil futbolunun fəxri sayılan “Advokat” komandası, əsasən heyəti Abşeron Vəkil Bürosunun üzvlərindən təşkil olunan “Abşeron” komandası, “Ədalət” Vəkil Bürosu tərəfindən təsis edilən “Ədalət” komandası, müxtəlif qurumların üzvləri olan vəkillərdən ibarət “Barrister” komandası, vəkil Rövşən Mərəndskiy tərəfindən təsis edilmiş “Kəpəz” komandası, vəkil Feyzulla Mehdiyev tərəfindən təsis edilmiş “Lawyers” komandası, vəkil Siracəddin Kərimov tərəfindən təsis edilmiş “Qarabağ” komandası, vəkil Ülvi Yusifov tərəfindən təsis edilmiş “İnter” komandası və Banklar Assosiyasiyası tərəfindən təsis edilmiş və heyətində yalnız müxtəlif banklarda işləyən vəkillərdən ibarət “Forward” komandası 2-ci VFL-də iştirak etmişdilər. İdman yarışında ümumilikdə 102 vəkil və 12 hüquqşünas iştirak etmişdir.

Turnirin birinci dövrəsi ərzində 36 oyun keçirilmiş, toplam 227 qol vurulmuşdur. Qeyd olunmalıdır ki, yekun mükafatlar arasında “'Ən yaxşı bombardir” mükafatının olması hücümçuları stimullaşdıraraq onların arasında əlavə rəqabət yaratmışdır. Birinci dövrənin yekununa “Ədalət” komandasının oyunçusu vəkil Turqay Babayev vurduğu 16 topla birinci, “Abşeron” komandasının 2 oyunçusu vəkillər Rauf Əmiraslanov 15 topla ikinci və Ümman Ağamalıyev 13 topla 3-cü yerdə olmaqla bombardirlər siyahısına başçılıq edirlər. Bombardirlər siyahısı 2-ci dövrədə davam etdiriləcəkdir.

Turnir ərzində hər hansı ciddi zədənin olmaması oyunların mehribanlıq və dostluq mühitində keçirilməsinə dəlalət edir. Btün oyunlar ərzində oyunçulara ümumilikdə 42 sarı vərəqə verilmişdir ki, onların böyük əksəriyyəti texniki səbəblərdən olmuşdur. Yəni, birbaşa həmkarı ilə və ya hakimlərlə mübahisə, kobudluq və sair xoşagəlməz hadisələr baş verməmişdir. Qırmızı kartların olmaması xüsusən vurğulanmalıdır.

Birinci dövrənin yekununa görə ilk 4 yeri tutmuş komandalar – “Advokat”, “Barrister”, “Abşeron” və “Ədalət” komandaları turnirin 2-ci dövrəsində iştirak edəcəklər. “Ev-qonaq” sistemi ilə keçiriləcək ikinci dövrədə hər komanda digər 3 komanda ilə 2 oyun oynayacaq və həmin dövrənin yekununa görə çempion, gümüş və bürünc mükafatçılar müəyyən olunacaqdır.

Əlavə olaraq qeyd olunmalıdır ki, ilk 4-lüyə düşə biməyən komandalar və "Vəkil futbol hərəkatı"na qoşulmaq istəyən yeni komandalar “Ümid” kuboku adı altında yeni turnirin keçirilməsini planlaşdırırlar.

2-ci VFL-in birinci dövrəsindən (8 oyundan) sonra turnir cədvəli aşağıdakı kimidir:

№	komanda	oyun	qələbə	bərabərlik	məğlubiyyət	vurduğu	buraxdığı	averaj	xal
1	Advokat	8	7	1	0	36	11	+25	22
2	Barrister	8	6	2	0	29	9	+20	20
3	Abşeron	8	6	1	1	41	11	+30	19
4	Ədalət	8	5	0	3	35	13	+22	15
5	Kəpəz	8	3	1	4	23	33	-10	10
6	Lavyers	8	2	1	5	16	21	-5	7
7	Qarabağ	8	2	1	5	21	40	-19	7
8	İnter	8	1	1	6	14	43	29	4
9	Forvard	8	0	0	8	12	46	34	0

Turnirin 2-ci dövrəsi ötən həftənin Şənbə günü başlamışdır.