Ceyhun Hacıbəyli küçəsi 100, AZ1007

Vəkillər Kollegiyası ilə Azərbaycan Banklar Assosiasiyası arasında əməkdaşlıq memorandumu imzalanıb

19 oktyabr 2022    576 share share

18 oktyabr 2022-ci il tarixində Azərbaycan Respublikası Vəkillər Kollegiyası (Vəkillər Kollegiyası) və Azərbaycan Banklar Assosiasiyası (ABA) arasında birgə qarşılıqlı əməkdaşlığa dair Memorandum imzalanmışdır.
 
Tədbir hər iki qurumun rəhbərinin iştirakçıları 18 Oktyabr – Müstəqilliyin Bərpası Günü münasibəti ilə təbriki ilə başlamışdır.
 
Memorandumu ABA-nın Rəyasət Heyətinin sədri Zakir Nuriyev və Vəkillər Kollegiyasının sədri Anar Bağırov imzalamışlar.
 
Memorandum imzalanmasını müsbət qiymətləndirən ABA-nın Rəyasət Heyətinin sədri Zakir Nuriyev bu sənədin gələcəkdə məhkəmə-hüquq sahəsində müvafiq proseslərinin daha da təkmilləşdirilməsinə, o cümlədən bank sahəsində yaranan mübahisələrin həllində vəkillərin, hüquqşünasların peşəkarlıq səviyyəsinin və bank sahəsi üzrə biliklərinin artırılmasına dəstək olunmasına töhvə verəcəyini xüsusi qeyd etmişdir. Bu Memorandum bank və maliyyə sisteminə aid qanunvericilik aktlarının, hüquqi-normativ sənədlərin təhlili və bu istiqamətdə zəruri təkliflərin hazırlanması, maliyyə-bank sisteminə aid müvafiq qanunvericilik təşəbbüslərinin işlənib hazırlanmasında vəkillərin peşəkar iştirakını, əlaqədar qurumlara əsaslandırılmış təkliflərin hazırlanması və bu qəbildən olan digər fəaliyyətlərin həyata keçirilməsinə imkan yaradacaqdır. “Məhkəmə-hüquq sistemində islahatlarin dərinləşdirilməsi haqqinda” Azərbaycan Respublikası Prezidentinin 3 aprel 2019-cu il tarixli Fərmanının qəbulu məhkəmə-hüquq sisteminin inkişafında yeni islahatların həyata keçirilməsində mühüm rol oynamişdir. Belə ki, sahibkarlıq fəaliyyəti ilə əlaqədar işlər üzrə ixtisaslaşmış məhkəmələrin və vahid məhkəmə təcrübəsinin yaradılması, elektron məhkəmə və icrası sisteminin tətbiq edilməsi və məhkəmə qərarlarının effektiv icrası sektor üçün xüsusi önəm kəsb edir. Vəkillər Kollegiyasının fəaliyyətindəki mütərəqqi dəyişikliklərin də təsiri ilə ölkəmizdə hüquqi yardım keyfiyyətinin durmadan artdığını, bu da öz növbəsində bizim sektorda xidmət və məsləhətlərin səviyyəsinin yüksəldiməsinə xidmət etdiyini qeyd edən Z.Nuriyev bank sektorunda da coxlu sayda vəkillərin çalışdığını bildirdi. O, bank mübahisələri həllində vəkillərin rolunun effektivliyinin artırılması, banklarda çalışan vəkil və hüquqşünasların güclu və nüfuzlu vəkillik institutundan bəhrələnməsi istiqamətində fəaliyyətimizin bundan sonra da davam edəcəyinə əminliyini söyləmişdir.
 
Daha sonra Kollegiyanın sədri Anar Bağırov çıxış edərək, Vəkillər Kollegiyasının əsas vəzifələrindən birinin hər bir şəxsin hüquq və azadlıqlarının, qanunla qorunan mənafelərinin müdafiə edilməsindən, onlara peşəkar, yüksək keyfiyyətli, vicdanlı hüquqi yardım göstərilməsini təmin etməkdən, vəkillik peşəsinin nüfuzunu yüksəltməkdən ibarət olduğunu tədbir iştirakçılarının diqqətinə çatdırmışdır. O həmçinin “Azərbaycan Respublikasında vəkilliyin inkişafı ilə bağlı əlavə tədbirlər haqqında” Azərbaycan Respublikası Prezidentinin 22 fevral 2018-ci il tarixli Sərəncamına əsasən, ötən dövr ərzində Kollegiyanın fəaliyyətində şəffaflığın artırılması və vəkillik fəaliyyətinin inkişafı üçün bir sıra zəruri tədbirlər görüldüyünü, ölkədə vəkilliyin nüfuzun artırılması istiqamətində bir sıra tədbirlər görüldüyünüvurğulamışdır. Bu səbəbdən aidiyyatı qurumlarla əməkdaşlıq əlaqələrinə xüsusi önəm verildiyini qeyd edən A.Bağırov, bu Memorandumun imzalanması ilə ümumi maraqların, real imkanların və qarşılıqlı əməkdaşlığın genişləndirilməsi istiqamətində səylərin birləşdirilməsinə, tədris, təlim və elmi-tədqiqat sahələrində fəal əlaqələr yaradılması və inkişaf etdirilməsinə, eləcə də normativ, maarifləndirici və digər materialların hazırlanmasında Kollegiya tərəfindən zəruri dəstək verilməsinin mümkünlüyünü xüsusi vurğulamışdır. O, həmçinin Vəkillər Kollegiyasının tərkibində biznes hüququ sahəsində ixtisaslaşan, tanınmış vəkilləri bir arada birləşdirən Biznes Hüququ Komitəsinin yarandığını və Memorandum çərçivəsində Komitə ilə ABA arasında qarşılıqlı səmərəli əməkdaşlığın olacağını da vurğulamışdır.
 
Tədbirdə Vəkillər Kollegiyasının fəaliyyətinə həsr olunan təqdimat keçirilib.
 
Sonda tərəflər bir-birinə xatirə hədiyyələrini təqdim etmişlər.