Sentyabrın 5-də Azərbaycan Respublikası Vəkillər Kollegiyasının (ARVK) Hüquqi Yardım Mərkəzində Birləşmiş Millətlər Təşkilatının (BMT) Qaçqınlar üzrə Ali Komissarlığının Hüquq şöbəsinin müdiri İvan Charnetskinin başçılıq etdiyi nümayəndə heyəti ilə görüş keçirilib.

Görüşü giriş sözü ilə açan ARVK-nın sədr müavini - Hüquqi Yardım Mərkəzinin direktoru Şahmar Məmmədov qonaqları Kollegiyanın sədri Anar Bağırovun adından salamlayıb, son illər Mərkəzdə görülən işlərdən və fəaliyyət istiqamətlərindən danışıb.

BMT-nin Qaçqınlar üzrə Ali Komissarlığı ilə 5 ildir ki, uğurlu əməkdaşlıq etdiyini vurğulayan sədr müavini bu əməkdaşlığın səmərəli və faydalı olduğunu, habelə Kollegiyanın qurumlar arasında münasibətləri yüksək qiymətləndirdiyini, gələcəkdə də birgə layihələrin keçirilməsi üçün mütəmadi görüşlərin vacibliyini bildirib.

Sonra BMT-nin Qaçqınlar üzrə Ali Komissarlığının Komissarlığının Hüquq şöbəsinin müdiri İvan Charnetski çıxışında ARVK-nın son illər həyata keçirdiyi fəaliyyətini təqdirəlayiq hesab etdiyini deyərək sıx əməkdaşlıqdan məmnun olduğunu və Kollegiyanın bu sahədə atdığı addımları yüksək qiymətləndirdiyini qeyd edib. Qonaq əməkdaşlığın zəruriliyini xüsusi vurğulayıb və ən qısa zamanda bu istiqamətdə növbəti əməli addımların atılması barədə fikir söyləyib. 

Eyni zamanda görüşdə qarşılıqlı maraq doğuran bir sıra digər məsələlər müzakirə edilib, fikir mübadiləsi aparılıb.