Məlum olduğu kimi, 30.03.2023-cü il tarixində Amerika Hüquq Məktəbi (SAL proqramı) ilə Azərbaycan Respublikasının Vəkillər Kollegiyası (ARVK) arasında anlaşma memorandumu imzalanıb. Əldə olunmuş razılığa və müstəsna güzəştlərə uyğun olaraq, qəbul zamanı ARVK üzvlərinə üstünlük verilir, habelə ARVK üzvləri SAL proqramı təhsili üçün əlavə 10% endirim tətbiq edilir.

Qeyd edək ki:

̶ SAL proqramı 2 semestr üçün nəzərdə tutulmuşdur və Çikaqo-Kent Hüquq Kollecində magistr dərəcəsi üçün 10 kredit qazandırır;

̶ 2 semestrlik proqramı bitirdikdən sonra məzunlar 3 il ərzində Çikaqo-Kent Hüquq Kollecinə müraciət edərək hüquq üzrə magistr (LLM) təhsillərini orada davam etdirirlər;

̶ SAL proqramının dərsləri onlayn qaydada və ya Bakı / Tbilisidə mövcud auditoriyalarda tədris oluna bilər (ayda bir dəfə həftə sonlarında keçirilməsi planlaşdırılır);

̶ TOEFL / IELTS tələb olunmur.

Yeni semestr üçün aşağıdakı tarixlər və güzəştlər müəyyən olunmuşdur:

̶ Son müraciət tarixi: 1 dekabr 2024

̶ ARVK üzvləri üçün təhsil haqqı 6 850 ABŞ dolları əvəzinə 6 165 ABŞ dolları təşkil edir.

Daha sonra Çikaqo-Kent Hüquq Kollecində təqdim olunan güzəştlər belədir:

̶ SAL məzunları təhsilini başa vurduqdan sonra LLM diplomunu bir tədris ili əvəzinə bir semestrdə qazana və 43 860 ABŞ dolları əvəzinə, sabit 10 000 ABŞ dolları ödəyə bilər;

̶ Ortalaması (GPA)  4-dən yuxarı olan SAL məzunlarına tam 100% təhsil təqaüdü verilir;

̶ SAL məzunları IELTS/TOEFL imtahanlarından azad edilir;

̶ LL.M semestri SAL-dan dərhal sonra və ya SAL-ı bitirdikdən üç tədris ili sonra da istənilən semestrdə davam etdirilə bilər;

̶ Çikaqo-Kentin daxili innovativ hüquq klinikaları vasitəsilə praktiki təcrübə;

̶ Çikaqo hüquq icması, ən yaxşı özəl hüquq firmaları, korporasiyalar və müxtəlif vəkil qurumları ilə birbaşa əlaqələr və təcrübə fürsətləri;

̶ Çikaqo-Kentdə iki semestr keçirən tələbələr ABŞ-da “OPT”-yə daxil ola bilərlər (12 aylıq təhsildən sonrakı iş icazəsi);

̶ Çikaqo-Kentdə iki semestrdən sonra məzunlar ABŞ-da vəkillik imtahanı verə bilərlər.

Müraciət edənlərin seçim meyarları:

̶ Hüquq üzrə bakalavr dərəcəsi;

̶ İngilis dilində yaxşı səviyyədə yazılı və şifahi ünsiyyət qurma bacarığı (TOEFL / IELTS tələb olunmur);

̶ Müsahibədə uğurlu iştirak.

Tələb olunan sənədlər:

̶ İngilis dilində tərtib olunmuş tərcümeyi hal - CV (tövsiyə edən şəxsin adı və əlaqə məlumatları qeyd olunmaqla);

̶ İngilis dilinə tərcümə edilmiş və notarial qaydada təsdiq olunmuş diplomun və diploma əlavənin surətləri;

̶ Xarici pasportun və ya şəxsiyyət vəsiqəsinin surəti;

̶ Vəkil vəsiqəsinin surəti.

Müraciət etmək istəyənlər tələb olunan sənədləri elektron (skan edilmiş) formatda saladmissions@kentlaw.iit.edu və admission@chicagokentlaw.ge elektron poçt ünvanlarına yönləndirilməli və ya onlayn qayda müraciət linki (SAL Application.) vasitəsilə qeydiyyatdan keçməlidir.

Əlavə olaraq, ARVK elektron poçt ünvanına (office@barassociation.az) məktub ünvanlayaraq müraciət barədə məlumat verməyiniz xahiş olunur. ARVK  müraciət edənlər tərəfindən məktubu aldıqdan sonra rəsmi qaydada SAL proqramının təsisçilərinə müvafiq məlumatı yönləndirəcək və müraciət edən vəkillər üçün təhsil haqqına güzəştlər tətbiq olunacaq.