14-17 aprel tarixlərində Azərbaycan Respublikası Vəkillər Kollegiyasının sədri (AR VK) cənab Anar Bağırovun rəhbərlik etdiyi nümayəndə heyəti Hindistan Vəkillər Kollegiyasının dəvəti ilə Hindistan Respublikasına rəsmi səfər etmişdir.
Tədbir iştirakçıları üçün əvvəlcə Hindistan Vəkillər Kollegiyasının Prezidenti cənab Prashant Kumarın paytaxt Nyu Dehlidə yerləşən iqamətgahında rəsmi ziyafət təşkil olunmuşdur.
Növbəti gün baş tutan konfrans “2023-cü il Nyu Dehli - "Qanunun aliliyinə dair Beynəlxalq Konvensiya”ya həsr olunmuşdur. Konfransda Beynəlxalq Vəkillər Kollegiyasının (IBA) baş katibi, Beynəlxalq Vəkillər Assosiasiyasının (UIA) vitse-prezidenti, dünyanın müxtəlif ölkələrindən vəkillər kollegiyaları və hüquq cəmiyyətlərinin rəhbərləri, habelə dövlət rəsmiləri və vətəndaş cəmiyyətinin nümayəndələri iştirak ediblər.
Konfransın plenar iclasında məruzəçilərdən AR VK-nın üzvü Yunis Nəsibov «Beynəlxalq Kommersiya Mübahisələrinin Həlli: İnkişaf etməkdə olan bazar və iqtisadiyyat üçün mükəmməllik mərkəzləri şəbəkəsinin problemləri və inkişaf perspektivləri» mövzusunda çıxış etmişdir. Y.Nəsibov Azərbaycan Beynəlxalq Kommersiya Arbitraj Məhkəməsi, Beynəlxalq Ticarət Palatasının (ICC) kommersiya mübahisələri, beynəlxalq kommersiya mübahisələrinin həllində AR VK-nın rolu, bu sahədə konfrans və seminarların keçirilməsi və bir sıra digər aktual məsələləri tədbir iştirakçılarının diqqətinə çatdırmışdır.
Daha sonra «Qlobal miqyasda qanunun aliliyinin təşviqində vəkillərin və onların birliklərinin rolu» mövzusunda Vəkillər Kollegiyalarının dəyirmi masası baş tutmuşdur. AR VK-nın sədri cənab Anar Bağırov çıxış edərək ölkəmizdə aparılan məhkəmə-hüquq islahatları, o cümlədən Azərbaycanda vəkillik institunun nüfuzunun artırılması istiqamətində həyata keçirilmiş tədbirlər, habelə qanunvericiliyin təkminləşdirilməsi, ölkə başçısının bir sıra fərmanları, onların əhəmiyyəti, pulsuz hüquqi yardımın göstərilməsi ilə əlaqədar mövcud problemlər, görülmüş işlər, qarşıda duran vəzifələr və prespektivlərlə bağlı məlumatları ilə tədbir iştirakçılarını yaxından tanış etmişdir.
Tədbir çərçivəsində Azərbaycan Respublikasının və Hindistan Respublikasının vəkillər kollegiyaları arasında əməkdaşlıq haqqında memorandum imzalanmış, xüsusilə Hindistanda yaşayan azərbaycanlıların və Azərbaycanda yaşayan hindistanlıların hüquqlarının səmərəli müdafiəsi ilə bağlı birgə təşəbbüslərə dair müddəalar memorandumda təsbit olunmuşdur.
Qeyd edək ki, hər iki qurum Asiya və Sakit Okeanı hövzəsi ölkələrinin hüquq cəmiyyətlərinin birliyinin (LAWASIA) üzvüdür.
AR Vəkillər Kollegiyası tərəfindən Hindistan Vəkillər Kollegiyasının rəhbərliyinə Azərbaycan Respublikasının mədəniyyət paytaxtı Şuşa şəhərinə və Atəşgah məbədinə həsr edilmiş əsərlər, AR VK-nın rəsmi emblemi, habelə bir sıra digər hədiyyələr təqdim edilmişdir.
Gələcək əməkdaşlığın gücləndirilməsi məqsədilə AR VK-nın sədri Anar Bağırovla Beynəlxalq Vəkillər Kollegiyaları Assosiyasının baş katibi və bir sıra ölkələrin Vəkillər Kollegiyalarının rəhbərləri arasında ikitərəfli görüşlər keçirilmiş, təcrübə mübadiləsi, habelə LAWASIA təşkilatı çərçivəsində gələcək əməkdaşlığın perspektivləri barədə müzakirələr aparılmışdır.
Sonda tədbir iştirakçıları üçün Hindistan Vəkillər Kollegiyası tərəfindən Hindistan Respublikasının Aqra şəhərində yerləşən, 1983-cü ildə UNESCO-nun Dünya Mədəni İrs Siyahısına, 2007-ci ildə isə ümumdünya səsverməsi nəticəsində “Dünyanın yeddi yeni möcüzəsi” siyahısına salınan Tac-Mahal abidəsinə səfər təşkil olunmuşdur.
.png)
.jpg)
.jpg)
